Urgutning Chep qishlog‘ida uni ko‘pchilik Tillo biyi deb atashadi. Boisi, biznesga moyilroq Shoira Suvonova odamlarning uncha-muncha ishini bitirib, og‘irini yengil qiladi. Kimga imorat solish uchun usta yoki mardikor zarur bo‘lsa, Tillo biyi telefon orqali darrov topib beradi. Qarz-havola masalasida ham unga teng keladigan “vallamat” yo‘q — qo‘ni-qo‘shnilari, qishloqdoshlariga pul berib, ko‘maklashib turadi. Qo‘lida doimo pul o‘ynaydigan bu ayolni shu sabab Tillo biyi — boy biyi deyishgan bo‘lsa ajabmas, deb yozadi “Zarafshon” gazetasi.
Tillo biyining boshqa “kasbi” ham bor ekan. U narkotik moddalar savdosi bilan shug‘ullanadigan kishilarga aloqador bo‘lgani uchunmi, harqalay, ko‘nglida ko‘proq pul topish istagi paydo bo‘ldi. Qo‘shnisi — Tojikistonda tug‘ilgan, 2001 yili O‘zbekiston fuqaroligini olgan Hakimxon Foziyevga ko‘nglidagi istagini bildirdi. “Ko‘proq bo‘lsa yaxshi, daromadi binoyidek bo‘ladi-da”, — dedi Tillo biyi Hakimxonga mug‘ombirona jilmayib.
Hakimxon uchun Tillo biyining gapi qonun. Chunki uning ro‘zg‘origa yordamlashib turadi, ayolning uyida xizmatini qiladi. Hakimxon pulga muhtoj bo‘lib turibdi, ota-onasi esa chegaraning narigi tomonida yashaydi. Bordi-keldi kam bo‘ladi.
Hakimxon Panjakent shahrida yashovchi sinfdoshi Ibrohim Haydarovga qo‘ng‘iroq qilib, opiy giyohvandlik vositasiga buyurtma berdi. “Bu yog‘iga xotirjam bo‘ling, har kilogramiga 3 ming dollardan berishadi. Ishonchli odam”, — deb do‘stiga qat’iy gapirdi.
Ibrohim 10 kilogramm miqdordagi opiyni osongina topadi. Jo‘rasi uqtirganidek, chegaradan xufyona o‘tish yo‘llarini ham bilib oldi. Ertasi kuni xavf-xatardan “omon-eson” o‘tib olgan Ibrohimni Hakimxon chegarada kutib oldi. To‘g‘ri Chep qishlog‘ining chetrog‘ida joylashgan uylariga borishdi. Hakimxon bu haqda Tillo biyiga xabar qilgach, ayol tomi cherdagidan 10 ming dollar olib kelib berdi, qolganini ham tezda topib berishini bildirdi.
Hakimxon jo‘rasi Ibrohim bilan tungi soat 4 larda xotirjam choy ichishayotganida uyiga chegara posti harbiylari kirib kelishdi. Ovcharka it giyohvand modda isini sezib, uni yashirgan joyga boshladi.
Huquq-tartibot idoralari xodimlari giyohvand moddalar oldi-sotdisi bilan shug‘ullanadigan guruhning faoliyatiga nuqta qo‘ydi. Tillo biyi — Shoira Suvonova sud hukmiga ko‘ra 11 yilga, Hakimxon Foziyev va Ibrohim Haydarov 14 yilga ozodlikdan mahrum etildi.
Izoh (0)