Islom Karimov nomidagi Fond ilk stipendiatlarni Germaniya, Italiya va Rossiyaning oliygohlariga o‘qishga yo‘llamoqda. Fondning 12 nafar stipendiati keyingi 2 yil davomida magistratura dasturi bo‘yicha chet el oliy o‘quv yurtlarida ta’lim oladi. Bu haqda Lola Karimova-Tillayeva Facebook’dagi sahifasida ma’lum qildi.
“O‘zbekistonning Oliy va o‘rta maxsus ta’lim vazirligi, Britaniya Kengashining vakolatxonasi, Germaniyaning O‘zbekistondagi elchixonasi hamda Inha, Turin Politexnika va Lomonosov nomidagi Moskva davlat universitetlarining Toshkentdagi filiallariga minnatdorlchigimni izhor etaman. O‘z bilimi va mehnati bilan yuqori natijalarga erishgan ushbu yoshlarni ko‘rganda insonning qalbi faxr tuyg‘usiga to‘ladi.
Grant sohiblarining barchasini chin dildan tabriklayman va o‘qishlarida omadlar tilayman. Ular Yevropaning peshqadam oliygohlarida ta’lim olib, kelajakda Vatanimiz ravnaqiga o‘z hissalarini qo‘shishiga ishonaman”, — deb yozdi Lola Karimova-Tillayeva.
Islom Karimov Fondi 2016-yil oktabr oyida mustaqil O‘zbekiston Respublikasining asoschisi va Birinchi Prezidenti xotirasini abadiylashtirish maqsadida tashkil etilgan. Iqtidorli yoshlarga milliy va xorijiy oliy o‘quv yurtlarida tahsil olish uchun grantlar taqdim etish Islom Karimov nomidagi fond faoliyatining muhim yo‘nalishlaridandir.
https://www.facebook.com/lola.karimova.tillyaeva/videos/1502600706493538/
Izoh (0)