Rossiya Filippin harbiylariga terrorizmga qarshi kurash uchun besh mingta avtomat va 20 ta yuk avtomobilini sovg‘a qildi. Bu haqda Filippin prezidenti Rodrigo Dutertening bayonotiga tayanib, The Philippine Star xabar bermoqda.
“Bizda besh mingta Kalashnikov avtomati va 20 ta harbiy yuk mashinasi bo‘ladi. Bu terrorizmga qarshi kurash uchun Rossiyaning sovg‘asi. Transport 22-oktabrda yetib keladi”, — deya ta’kidlagan prezident. Shuningdek, u qurollar va mashinalarning bepulligini qo‘shimcha qilgan.
Filippinliklar o‘z hududida jihodchilarga qarshi kurashmoqda. Maravi shahri uchun kurash 2017-yilning 23-mayida IShIDga qasamyod qilgan jangarilar tomonidan egallab olingach boshlangan. Rasmiy ma’lumotlarga ko‘ra, janglar vaqtida 158 nafar askar, 87 nafar tinch aholi vakili va 774 nafar jangari halok bo‘lgan.
Vladimir Putin va Duterte o‘rtasida joriy yilning 21-mayida bo‘lib o‘tgan uchrashuvda Filippin prezidenti Putindan zamonaviy qurollar so‘ragan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)