O‘zbekiston Sog‘liqni saqlash vazirligida Rossiyaning Vladimir viloyatida 6-oktabr kuni yuz bergan avtohalokat oqibatida jabrlangan O‘zbekiston fuqarolariga tibbiy yordam ko‘rsatish bo‘yicha tezkor guruh tuzildi. Bu haqda vazirlik axborot xizmati “Daryo”ga ma’lum qildi.

Foto: Vladimir viloyati politsiyasi

Guruh malakali jarroh, neyrojarroh, travmatolog, ortoped, anesteziolog, nevrolog kabi mutaxassislardan tarkib topgan. Ular zarur tibbiy vositalar, dori-darmon zaxiralari bilan yetarli darajada ta’minlangan.

“Ayni vaqtga guruh Rossiya Federatsiyasiga uchib ketishga tayyor holatda”, — deyiladi vazirlik axborotida.

Respublika shoshilinch tibbiy yordam ilmiy markazida halokat oqibatida jabrlanganlarga yuqori malakali tezkor tibbiy yordam ko‘rsatish uchun zaxira o‘rinlari tayyorlandi. Qo‘shimcha dori-darmon va tibbiy vositalar yetkazib berildi.