Norvegiya telegraf byurosi 26-sentabr, seshanba kuni mamlakatning 80 yoshli qiroli Xarald V vafoti haqida yanglish xabar tarqatdi. Bu haqda “TASS” ma’lum qildi.
“Qirol sog‘-omon. NTB yuz bergan holat yuzasidan afsus bildirdi. Hamma xato qilishi mumkin”, — dedi valiahd shahzoda Xokon Magnus.
NTB bosh muharriri va ijrochi direktori Mads Ingve Starvikka ko‘ra, agentlik obunachilariga qirolning o‘limi haqida oldindan tayyorlangan xabar tasodifan jo‘natib yuborilgan. Agentlikda boshqa ko‘plab yirik OAVlari kabi mamlakatning oliy martabali shaxslariga oid batafsil ta’ziyanoma, shuningdek, zudlik bilan tarqatishga mo‘ljallangan qisqa xabarlar oldindan tayyorlanadi va yangilanib turiladi.
Xato esa shunday xabarlardan birini yangilash chog‘ida ro‘y berdi. Biroq matn joriy yangiliklar qatoriga qanday kirib qolgani hozirgacha noma’lum.
Izoh (0)