Bloger Tom Skott Yel universiyeti (Konnektikut shtati, AQSh) professori Gert Ruvenxorst bilan ta’lim muassasasi arxivida saqlanayotgan 369 yoshli obligatsiya haqida suhbatlashdi, deb xabar berdi TJournal.
Ushbu qimmatli qog‘oz 1648-yilning 15-mayida De Stichtse Rijnlanden niderland kooperatsiyasi tomonidan Quyi Reyn hududidagi kanallar va to‘g‘onlarni boshqargan yer egalari va boy fuqarolar o‘rtasida tuzilgan. Hujjat Lek daryosi bo‘yida prichal (langar tashlab qo‘yiladigan joy) qurish ishlarini moliyalashtirish maqsadida tuzilgan.
Obligatsiya echki terisining parchasiga yozilgan. Hujjatning amal qilish muddati ko‘rsatilmagan, matnda doimiy ravishda yillik daromadning 5 foizidan olish qayd etilgan (keyinchalik foizlar 3,5 ga, so‘ng 2,5 foizga tushirilgan).
Yel universiteti ushbu hujjatni 2003-yilda 24 ming yevroga sotib olgan. Universitetning ko‘plab xodimlari qadimiy obligatsiya daromad manbai bo‘lishini kutmagan. 2015-yilda Ruvenxorst Niderlandiyaning Utrext shahridagi suv resurslari boshqarmasining shtab-kvartirasiga yo‘l olgan va 26 yil ichida birinchi bor qimmatli qog‘zoning foizlarini qo‘lga kiritgan (136,2 yevro atrofida).
Yel obligatsiyasi — amal qilish muddati ko‘rsatilmagan va haligacha foizlari to‘lab kelinayotgan favqulodda noyob qimmatli qog‘ozdir. Bu kabi narsa hamon borligi hayratlanarli.Gert Ruvenxorst, Yel universiteti professori
Izoh (0)