Iroq rasmiylari kurd referendumi natijalari ustida ishlash niyatida emas. Bu haqda 25-sentabr, dushanba kuniga mo‘ljallangan referendum arafasida mamlakat bosh vaziri Haydar al-Obodiy ma’lum qildi, deya xabar beradi “RIA Novosti”.
“Referendum va uning natijalari bo‘yicha ishlash bo‘lmaydi. Biz mamlakat yaxlitligi va yakdilligi, barcha fuqarolar manfaatlarini himoya qilishga qaratilgan harakatlarimizni davom ettiramiz”, — deyiladi bosh vazir matbuot xizmati tomonidan tarqatilgan bayonotda.
Al-Obodiy bo‘lajak tadbirni yana tanqid qildi va mintaqaning muammolari Bag‘dod bilan bog‘liq emasligi, mahalliy rasmiylar “korrupsiyasi va yomon boshqaruvi” natijasi ekanligini bildirdi.
“Biz uchun qadrli kurd xalqiga mintaqaning aksariyat muammolari ichki ko‘rinishga egaligi va Bag‘dod bilan bog‘liq emasligi, ajralib chiqish haqidagi da’vatlar ularni yanada chuqurlashtirishini tushuntirish lozim”, — dedi Iroq hukumati rahbari.
Eslatib o‘tamiz, Iroq Kurdistonining mustaqilligi to‘g‘risidagi referendumda 3,7 million kishi ovoz berishi kutilmoqda.
Izoh (0)