19-sentabr kuni Meksikada ro‘y bergan zilzila oqibati halok bo‘lganlar soni 293 kishiga yetdi. Bu haqda mamlakat milliy qidiruv-qutqaruv xizmati rahbari Luis Felipe Puente ma’lum qildi, deb xabar berdi “TASS”.
“Hozirga qadar 293 kishi halok bo‘lgani aytilmoqda: Mexikoda 155 kishi, Morelos shtatida — 73, Puebla shtatida — 45, Mexiko shtatida — 13, Gerrero shtatida — 6 va Oaxaka shtatida bir kishi”, — deb yozadi Puente o‘zining Twitter’dagi sahifasida.
Mexiko hukumati rahbari Migel Anxel Manseraning ma’lum qilishicha, mamlakat poytaxtidagi vayronalar ostidan 69 kishi qutqarib olingan. Rasmiylar omon qolganlarni qidirish ishlarini davom ettirmoqda.
Avvalroq, halok bo‘lganlar soni 286 kishiga yetgani haqida xabar berilgandi.
Meksika milliy seysmologiya xizmatining ma’lumotlariga ko‘ra, yer osti silkinishlarining epimarkazi poytaxtdan 111 kilometr janubda, Axochyapan (Morelos shtati) aholi punktidan 12 kilometr janubi-sharqda joylashgan. Uning o‘chog‘i 57 kilometr chuqurlikda bo‘lgan.
Izoh (0)