O‘FF matbuot xizmati tashkilot prezidentiga aylangan Umid Ahmadjonovning tarjimai holini taqdim etdi. Unda yangi prezident karyerasidagi yutuqlar va o‘zgarishlar bayon qilingan.

Foto: O‘FF

Ahmadjonov 40 yoshida O‘FF prezidenti bo‘lishga erishdi. U 1977-yilning 16-may kuni Toshkent shahrida tavallud topgan. Millati — o‘zbek. Ma’lumoti — oliy. O‘zbekiston davlat jismoniy tarbiya institutini imtiyoz bilan tugatgan. Toshkent shahar Xalq deputatlari kengashining deputati.

U mehnat faoliyatini 1995-yil “Zenit” firmasida oddiy ishchi sifatida boshlagan. 1995—2001-yillar davomida “Ilmu Ziyod” xususiy korxonasida ishchi, keyinroq 26-sonli qurilish boshqarmasida operator bo‘lib ishladi. Shuningdek, Olimpiya AJda avtosanoat bo‘limi rahbari sifatida faoliyat olib bordi.

Ahmadjonovning sport sohasiga kirib kelishiga faoliyati davomidagi ishbilarmonligi va tashabbuskorligi sabab bo‘ldi, deyiladi tarjimai holda. Tashkiliy ishlar, boshqaruv sohasidagi bilim va tajribalari evaziga u 2002-yil O‘zbekiston nogironlari sport federatsiyasi bosh kotibi lavozimiga tayinlandi. 2007-yilga kelib, O‘zbekiston milliy Paralimpiya assotsiyatsiyasi Bosh kotibi va bir vaqtning o‘zida tashkilot raisining o‘rinbosari bo‘ldi.

Qiziq tomoni, u 2007-yilda O‘zbekiston dzyudo federatsiyasi raisiga ham o‘rinbosar bo‘lgan. Qo‘shimchasiga, MOQ vitse-prezidenti lavozimida ham samarali faoliyat yuritgan. Ya’ni, bir yilning o‘zida 4 ta vazifa.

Umid Ahmadjonov ushbu tashkilotlardagi faoliyati davomida mamlakatda sport sohasining rivojlanishiga hissa qo‘shdi. Mamlakat paralimpiyachilarining jahon arenalarida ulkan yutuqlarni qo‘lga kiritishida katta rol o‘ynadi. Aynan u ishlagan davrda O‘zbekiston paralimpiya delegatsiyasi Rio-de-Janeyro shahrida o‘tkazilgan yozgi Paralimpiada o‘yinlarida tarixiy natija qayd etdi. O‘zbekistonlik sportchilar jami 31 ta: 6 ta oltin, 8 ta kumush hamda 17 ta bronza medalini qo‘lga kiritib, o‘z tarixidagi eng yaxshi natijani qayd etdi.

Tarjimai holi keltirib o‘tilgan shaxsning sport federatsiyalari va assotsiatsiyalaridagi ko‘p yillik faoliyati, mehnati hukumat hamda jamoatchilik e’tiborini qozondi. Ahmadjonov Umid Mahamatjonovich 2017-yilning 12-sentabrida O‘zbekiston futbol federatsiyasi prezidenti etib saylandi.

Umid Ahmadjonov oilali, uch o‘g‘il va bir qizning otasi. Shu vaqtgacha qilgan ishlari uchun “Do‘stlik” ordeni bilan taqdirlangan.

Tarjimai holda Umid Ahmadjonovning O‘FF prezidenti bo‘lguniga qadar “Paxtakor” klubida avvaliga bosh direktor, keyinroq prezident Bobur Shodiyevga vitse-prezident bo‘lgani ko‘rsatilmagan. Ayni vaqtda Bobur Shodiyev O‘FF ijroqo‘mining a’zosi etib tayinlangan. U “Paxtakor”ga qadar O‘zbekiston dzyudo federatsiyasida vitse-prezident bo‘lgan. Umid Ahmadjonov 2007-yil dzyudo federatsiyasida ishlagani haqida yuqorida ma’lumot berilgan.