“Istiqlol” san’at saroyining direktori Isroil G‘ulomov jurnalist Feruz Muhammadga intervyu berdi. Isroil G‘ulomov suhbat davomida chet ellik xonandalarning konsert biletlari qimmat bo‘lishining sabablarini Bochellining konsert dasturi misolida tushuntirib berdi.

Foto: “Myday.uz”

—Chiptalarning ko‘chada sotilishi tufayli Bochellining konsert chiptalari 10 million so‘mga chiqib ketgani rostmi ?

—Unday bo‘lgani yo‘q. “Istiqlol” san’at saroyidagi 30—35 yillik faoliyatim mobaynida Bochellini shaxsan o‘zim birinchi marta ko‘rishim edi. Shu konsert dasturini tashkillashtirgani uchun Prezidentimizga, bosh vazirimizga hamda Alisher Usmonovga minnatdorchilik bildirib qolaman. Chet eldan keladigan har bir xonanda hech bo‘lmasa 100—120 nafar yordamchilari bilan keladi. Ularning oddiygina aviachiptasi ming dollardan turadi, shunday ekan, umumiy hisobda yo‘lning o‘ziga 130 ming dollar ketadi. Bundan tashqari, ular yurtimizga kelganidan so‘ng kamida 650 million so‘m xarajat qilamiz. Ushbu xarajatlar ularning mehmonxonada turishi, ovqatlanishi hamda bu yerda yurishi uchun sarflanadi. Masalan Bochellining konserti 8-iyul kuniga belgilangan bo‘lsa, uning jamoasi 3-iyul kuni Toshkentga yetib kelgan edi. Bochelli jamoasiga qoyil qolgan joyim shunda bo‘ldiki, ular sahnaning har bir santimetrini, o‘tiradigan joylarini, xor jamoasi joylashadigan o‘rinlarni o‘lchab, o‘rganib chiqishdi. Muxlislar e’tibor berishdimi yo‘qmi bilmadigu, ammo biz zalning birinchi qatorini olib tashladik. Ushbu qatorning o‘rniga ular kichkina, ovozning mayin chiqishini va u zalning har bir burchagiga yetib borishini ta’minlaydigan kolonkalar o‘rnatishdi.

—Xuddi o‘sha Bochelli o‘zi bilan olib kelgan texnikaning narxiga qiziqmadingizmi?

—U texnikaning bir kunlik ijara haqi 103 ming yevro ekan.

—Demak, agarda chipta narxi 10 million so‘m bo‘lgan taqdirda ham, Bochellining yurtimizga kelishi, jamoasining va o‘zining bu yerda yurishi, texnikasi hamda gonorarini qoplamas ekanda, shundaymi?

—Sotilgan chiptalar hattoki Bochellining o‘zi uchun to‘lanadigan gonorarni ham qoplamas edi. Ushbu konsert dasturi Prezidentimiz Shavkat Mirziyoyevning, shuningdek, bosh vazirimiz hamda Alisher Usmonovning yurtdoshlarimizga qilgan sovg‘asi bo‘ldi.