2-sentabr kuni Rossiyaning “NTV” telekanalida “Ti super! Tansi” teleloyihasining davom boshlandi. O‘zbekistonlik uch ishtirokchi birinchilar qatorida shouda chiqish qildi, deb xabar beradi “Novosti Uzbekistana”.

Foto: “Novosti Uzbekistana”

Nastya, Durdona va Monika teleloyiha sahnasida o‘zbek xalq raqsi bilan chiqish qildi. Milliy liboslarda ijro etilgan raqs hakamlar hay’ati tomonidan e’tirof etildi. Ta’kidlanishicha, hakamlar ushbu raqsga qiziqish bildirib, hatto uning xatti-harakatlarini takrorlashga urindi. Raqs tugagach, qizlar qizg‘in olqishlandi.

Loyiha an’anasiga muvofiq, kadr ortidagi ovoz ishtirokchilarning tarixini so‘zlab berdi. Ma’lum bo‘lishicha, Durdonaning ota-onasi xastalikdan vafot etgan, Monikaning onasini esa uning ko‘z o‘ngida o‘ldirishgan ekan. Nastyaning onasi esa sakkiz yildan buyon ichkilikka mukkasidan ketgan ekan. Shunday hayotiy qiyinchiliklarga qaramay, qizlar o‘z ustida ishlashga kuch topa olgan ekan.

Hakamlar hay’ati O‘zbekiston vakillari keyingi bosqichga o‘tishlarini bir ovozdan yoqlab chiqdi. Ularning keyingi chiqishini taxminan bir oydan so‘ng ko‘rish mumkin bo‘ladi.