Xitoy 2025-yilga kelib past orbitaga 156 ta kichik aloqa sun’iy yo‘ldoshini chiqarishni rejalashtirmoqda. Ular yer yuzidagi borish qiyin bo‘lgan manzillar aholisini internet bilan ta’minlashda qo‘llanadi, deya xabar beradi “TASS”.
“Xunyun” loyihasi Xitoy aerokoinot fanlari va sanoati korporatsiyasi (CASIC) tomonidan ishlab chiqilgan. Birinchi sun’iy yo‘ldoshning uchirilishi 2018-yilga mo‘ljallangan, yana 4 ta qurilma 2020-yilda orbitaga chiqariladi.
Loyiha doirasida korporatsiya 2025-yilgacha barcha 156 sun’iy yo‘ldoshni foydalanishga topshirishni rejalashtirmoqda.
Olimlar hisob-kitobiga ko‘ra, hozirda yer yuzi aholisining yarmiga yaqini internetdan foydalanishdan mahrum. “Xunyun” loyihasi tog‘li hududlar, sahrolar, olis orollar va boshqa borish qiyin bo‘lgan manzillar aholisiga yuqori tezlikda tarmoqqa ulanish, shuningdek, havo va dengiz kemalarida internet-aloqa sifatini oshirish imkoniyatini yaratadi.
Izoh (0)