Tojikistonda prezident buyrug‘i bilan bir-birini tanimaydigan yigit va qizni uylantirib qo‘yishdi

20-avgust kuni qishloq maktabida o‘qituvchi bo‘lib ishlaydigan 23 yoshli yigit Tojikiston prezidenti Emomali Rahmonga atab she’r o‘qib berdi, deb yozadi Forum Daily.

“Men yosh o‘qituvchi sifatida o‘zimni eng baxtiyor inson deb his qilyapman, chunki sizdek hurmatli xalq yetakchisi qarshisida nutq so‘zlash sharafiga muyassar bo‘ldim”, — deya o‘z so‘zlariga yakun yasadi u.

Bunga javoban Rahmon yigitdan uylangan-uylanmaganligini so‘radi. Shundan so‘ng prezident uni yoniga chaqirib, qo‘l soati hadya qildi, shuningdek, mahalliy ma’muriyatga uni uylantirib qo‘yishni buyurdi.

Yigit uchun kelinni o‘n kun ichida topishdi, bungacha yoshlar bir-birini tanimagan. Kelin bola tuman kasalxonasida ishlaydigan hamshira bo‘lib, o‘zining aytishicha, uni turmushga chiqishga majburlashmagan, uning o‘zi to‘ydan keyin ishlashni davom ettirish sharti bilan rozi bo‘lgan.

To‘y xarajatlarini tuman ma’muriyati qoplab berdi.