Makron ma’muriyati prezidentga arzonroq vizajist topishga va’da berdi

Fransiya prezidenti Emmanuel Makronning ma’muriyati OAV tomonidan prezident Yelisey saroyidagi faoliyatining dastlabki uch oyida makiyaj uchun 26 ming dollar sarflagani haqida tarqatilgan xabarlarni tasdiqladi, deb xabar berdi “Interfaks”.

Associated Press’ning Makron jamoasiga asoslanib ma’lum qilishicha, ayni vaqtda amaldagi vizajistning o‘rniga arzonroq bo‘lgan boshqa yechim qidirilmoqda.

Avvalroq, Le Point nashri tomonidan mamlakat prezidenti makiyaj uchun qancha pul sarflashi haqida chop etilgan xabardan so‘ng Fransiyada mojaro boshlangandi. Shuningdek, nashrning yozishicha, bundan oldingi prezident Fransua Olland sartarosh xizmatlari uchun 10 ming yevro sarflagan.

Makron makiyaji mojarosi uning mamlakatda obro‘sining tushib borayotgani davriga to‘g‘ri kelib qoldi. So‘rovlarga ko‘ra, uni jamiyatda qo‘llab-quvvatlovchilar soni doimiy ravishda tushib bormoqda. Bunga budjetni qisqartirish va mehnat tizimidagi qarama-qarshi islohotlar rejasi sabab bo‘lmoqda.