15-avgust kuni Zimbabvening birinchi xonimi Greys Mugabe 20 yoshli modelga tashlangani sababli JAR sudida javob berishi ma’lum bo‘ldi. Hujum sabablari hozircha noma’lum.
Davlat rahbarlarining farzandlari va rafiqalari nima sabablar tufayli sudda javob berishga majbur bo‘lganligi “RBK” tahlilnomasida.
Surinami prezidentining o‘g‘li, “Hizbulloh” harakati bazasini tashkil etish rejasi va narkotiklar savdosi
2015-yilning martida Surinami prezidentining o‘g‘li Dino Buterse Nyu-York sudi tomonidan 16 yillik qamoq jazosiga hukm qilindi. Bunga uning AQShda terrorchilik tashkiloti deb topilgan “Hizbulloh” harakati bazasini tashkil etish rejasi sabab bo‘ldi. U harakat a’zolariga 2 million dollar evaziga bazani tashkil etishni taklif qilgan. Sud jarayonida davlat rahbarining o‘g‘li aybini tan oldi. “Qilgan ishlarimdan haqiqatda juda afsusdaman, juda, juda, juda uyatdaman”, — dedi u. Buterse, shuningdek, narkotiklar va qurol-yarog‘ savdosidagi aybini ham tan oldi.
Eron sobiq prezidentining qizi, hukumatga qarshi targ‘ibot
2012-yilning yanvarida Eron sobiq prezidenti Ali Akbar Hoshimiy Rafsanjoniyning qizi hukumatga qarshi targ‘ibot uchun yarim yillik qamoq jazosiga hukm qilindi. Jinoiy jazoga tortilishiga Fayeze Hoshimiyning 2009-yildagi xalq g‘alayonlaridagi ishtiroki sabab bo‘ldi. 2017-yilning martida sobiq davlat rahbarining qizi yana yarim yilga hukm qilindi — bu safar sud tizimi va qo‘riqlov xizmatini tanqid qilgani uchun.
Eron sobiq prezidentining o‘g‘li, chet el maxsus xizmatlari bilan aloqalari va tartibsizliklar tashkilotiga aloqadorlik
Fayezening akasi, Eron sobiq prezidentining o‘g‘li Mehdi Hoshimiy Rafsanjoniy 2015-yilning martida korrupsiya va milliy xavfsizlikka qarshi jinoyatlarda ayblanib 15 yillik qamoq jazosiga hukm qilindi. 2010-yilda Eron sudi ommaviy tartibsizliklarni tashkil etish va Britaniya maxsus xizmatlari bilan aloqalari tufayli Britaniyada bo‘lgan Mehdini sirtdan hibsga oldi. 2012-yilda u vataniga qaytdi va deyarli shu zahoti hibsga olindi.
Indoneziya sobiq prezidentining o‘g‘li, qotillik
2002-yilda Indoneziya sobiq prezidentining o‘g‘li Tommi Suxarto 15 yillik qamoq jazosiga hukm qilindi. Bunga uni korrupsiyada ayblab 1,5 yilga hukm qilgan sudyani o‘ldirishni uyushtirganligi sabab bo‘ldi. Voqealar yakunida Suxarto besh yildan kamroq qamoqda bo‘ldi — 2006-yilda u shartli ravishda muddatidan oldin ozod qilindi va siyosatga qaytdi. Bir necha oy avval Suxarto 2019-yilgi prezidentlik saylovlarida o‘z nomzodini qo‘ymoqchi ekanligini ma’lum qildi.
Liberiya sobiq prezidentining sobiq rafiqasi, qiynoqqa solish
2017-yilning 1-iyunida Buyuk Britaniyada qiynoqqa solishni tashkillashtirgan va amalga oshirgan Liberiya sobiq prezidenti Charlz Teylorning sobiq rafiqasi hibsga olindi. Tergov xulosasiga ko‘ra, Sharqiy Londonda istiqomat qilgan Agnes Rivz Teylor 1989—1991-yillarda davom etgan fuqarolik urushidagi qiynoqqa solishlarga aloqador bo‘lgan. U Charlz Teylor bilan u prezident bo‘lgunga qadar ajrashgan edi.
Gonduras sobiq prezidentining o‘g‘li, narkotiklar savdosi
2016-yilning mayida Gonduras sobiq prezidentining o‘g‘li Porfirio Lobo AQShga kokain partiyasini olib kirish maqsadini ko‘zlagan shartnomadagi aybini tan oldi. U 2015-yilda Gaitida qo‘lga olingan va AQShga keltirilgan edi. Mazkur ish bo‘yicha qaror 5-sentabrda chiqarilishi kutilmoqda.
Paragvay prezidentining o‘g‘li, mushtlashuv
2013-yilning oktabrida Paragvay prezidenti Orasio Kartesning katta o‘g‘li Xuan Pablo Kartes Mayamidagi xolasiga tegishli dala hovlida qo‘lga olindi. Ziyofat kechasida mehmonlardan biri Kartes uning ko‘ziga urgandan so‘ng politsiya chaqirgan. OAVlarining ma’lum qilishicha, u mast holatda bo‘lgan. Keyinroq Kartes 1,5 ming dollarga yaqin garov puli evaziga ozod qilingan. “Bu mening aybim bilan bo‘lmagan bo‘lsa-da kechirim so‘ramoqchi edim. Bu hayotimdagi eng yomon kunlardan biri, tafsilotlariga to‘xtalishni istamasdim”, — deydi prezidentning o‘g‘li.
Misr sobiq-prezidentining o‘g‘li, ommaviy tartibsizliklarda ishtirok etish
2016-yilning dekabrida Muhammad Mursiyning o‘g‘li Usama 2013-yilning avgustidagi ommaviy tartibsizliklarda ishtirok etganlikda ayblanib hibsga olindi. Tartibsizliklarni tarqatib yuborish chog‘ida yuzlab namoyishchilar halok bo‘lgan edi. U Misrda taqiqlangan “Musulmon birodarlar” harakati tomonidan tashkil etilgan tartibsizliklarda ishtirok etish, shuningdek, politsiya, armiya va davlat muassasalari vakillariga nisbatan zo‘ravonlikka undashda ayblandi. Shu yilning avgustida Usama Mursiy qamoqda uning huquqlari buzilayotgani: unga o‘qishni yakunlash imkoni berilmayotgani, ibodat qilish va qarindoshlari bilan uchrashish taqiqlanganidan shikoyat qildi.
Izoh (0)