Abdulla Aripov Qirg‘izistonda O‘zbekiston madaniyati kunlarini o‘tkazishni taklif qildi

Qirg‘iziston poytaxti Bishkekda O‘zbekiston—Qirg‘iziston hukumatlararo komissiyalari majlisi bo‘lib o‘tdi, deya xabar bermoqda “O‘zbekiston 24” telekanali.

Majlisda so‘z olgan O‘zbekiston bosh vaziri Abdulla Aripov o‘zbek va qirg‘iz xalqlarining azaliy qardoshlik munosabatlari, urf-odat va an’analari o‘xshashligi o‘zaro hamkorlikni izchil rivojlantirishda muhim omil bo‘layotganini qayd etdi.

Keyingi paytlarda ikki davlat o‘rtasidagi aloqalar sezilarli darajada faollashdi. Davlat rahbarlarining muloqotlari, hukumatlar va hududlar darajasida delegatsiyalar almashinuvi amalga oshirilmoqda.

Hukumatlararo komissiya majlisi so‘nggi marta 2009-yilda o‘tkazilgan edi. Bu muloqot esa oradagi bo‘shliqni to‘ldirish uchun qulay imkoniyatdir. Ikki davlat ko‘plab sohalarda hamkorlik qilib kelmoqda. O‘zaro tovar ayirboshlash hajmini yil sayin ortishidan ikki tomon ham manfaatdor.

Abdulla Aripov, O‘zbekiston bosh vaziri

O‘zbekiston tomoni ikki mamlakatning madaniy-gumanitar yo‘nalishdagi hamkorligini rivojlantirish uchun bor kuch g‘ayratini sarflashga tayyorligini bildirgan.

Xususan, 2017-yili Qirg‘izistonda O‘zbekiston madaniyati kunlarini, 2018-yili esa O‘zbekistonda Qirg‘iziston madaniyati kunlarini o‘tkazish taklif qilingan.

Shuningdek, muloqot chog‘ida kinematografiya sohasida ham o‘zaro almashinuvni ko‘rib chiqish lozimligi alohida qayd etib o‘tilgan.