Xorazm viloyatida litsenziyasiz yo‘lovchi tashigan 13 haydovchi sayyor sud qaroriga ko‘ra 20 million 968 ming 500 so‘m jarimaga tortildi. Bu haqda “1news.uz” xabar bermoqda.
Urganchda o‘tkazilgan sayyor sud natijasida, O‘zbekiston Respublikasi Ma’muriy javobgarlik to‘g‘risidagi kodeksning 176-3-moddasida (avtomobil transportida yo‘lovchilar tashish faoliyati bilan litsenziyasiz shug‘ullanish) nazarda tutilgan tartibda 13 nafar fuqaroga nisbatan jami eng kam oylik ish haqining 140 barobari miqdorida jarima jazolari qo‘llanildi.
O‘zbekiston avtomobil va daryo transporti agentligi axborot xizmati bildirishicha, huquqbuzar haydovchilar o‘z vaqtida litsenziyasiz avtotransportlarda yo‘lovchi tashiganligi uchun pushaymonligini bildirib, bo‘lib o‘tgan sayyor suddan o‘ziga tegishli xulosa chiqarganligini hamda tez fursatlarda yo‘lovchi tashish faoliyati uchun litsenziya olib, harakatni qonuniylashtirib davlat oldidagi majburiyatlarini bajarishga so‘z berdi.
Izoh (0)