“Qora bozor”dan olingan benzin, “yomon yo‘l”da rasvo bo‘lgan g‘ildirak: Shotlandiyaning to‘rt g‘ildirakli “buqa”si O‘zbekistondan o‘tdi
O‘zbekistonlik haydovchilarning Facebook’dagi eng ommabop guruhlari — “Voditeli Tashkenta” va “Voditeli Tashkenta (Drivers.uz)” guruhlarida shoxli va mo‘ynali Ford’ning suratlari tarqaldi. Avtomobil chet ellik mehmonniki ekani yaqqol seziladi.
Foydalanuvchilar mazkur mashinaga turlicha munosabat bildirgan. “Buqa-ku!”, — deb ta’rif bergan foydalanuvchilardan biri. “Bu mashinani yuvish uchun alohida shampun kerak bo‘lsa kerak”, — deb tasavvur qilgan boshqa bir foydalanuvchi.
“Vikinglar Toshkentda!”, — deb yozgan yana bir foydalanuvchi. Boshqalar esa bu vikinglar emas, balki britaniyalik sayohatchilar ekani, ular Shotlandiyadan Mo‘g‘ulistonga safar qilayotganini ta’kidlagan. “Mo‘g‘ulistondagi yovvoyi hayvonlar to‘dasi ichida meni sezmay qolishadi, deb o‘ylayotgan bo‘lsa kerak”, — deb hazil qilgan ulardan biri.
Haqiqatan ham, mazkur Ford avtomobili sayyoradagi eng qiziqarli sayohat poygalaridan biri — Mongol Rally’da ishtirok etayotgan Team Jackie Moo Art jamoasiga tegishli. Jamoa Shotlandiyadan Mo‘g‘ulistongacha bo‘lgan yo‘lni bosib o‘tish hamda demensiya kasalligiga qarshi kurash uchun xayriya mablag‘larini to‘plashni maqsad qilgan.
“Buqa mashina” uzoq yo‘ldagi kechmishini Twitter’dagi sahifasida yozib boradi. Xususan, mashina 5-avgust kuni Turkmaniston poytaxti Ashxoboddan o‘tgan bo‘lsa, 7-avgust kuni O‘zbekistondagi ilk tvitini yozgan edi. “Mashina O‘zbekistonda chuqurlarga to‘la yo‘lda ikki g‘ildiragidan ayrildi. Buxorogacha qolgan 15 kilometrni uch g‘ildirakda bosib o‘tdi”, — deyiladi birinchi xabarda.
Morag wiped out TWO wheels on Uzbekistan pothole strewn road. Limped last 15km into Bukhara on three wheels@PeoplesFord #Moragthecowcar pic.twitter.com/yIc5sMZCMQ
— Morag The Cow Car (@MoragTheCowCar) August 7, 2017
Xuddi shu kuni chiqarilgan ikkinchi tvitda shotlandiyaliklar O‘zbekistonda yonilg‘i muammosiga duch kelganini anglash mumkin: “O‘zbekistonda benzin topish mushkul. Mashina o‘z chanqog‘ini zudlik bilan ‘qora bozor’ orqali qondirishi kerak bo‘ldi”. 9—10-avgust kunlari “buqa mashina” Toshkent ko‘chalarida suratga olingan va hozir, katta ehtimol bilan, Qozog‘istonga chiqib ketgan.
Petrol hard to get in Uzbekistan. Thirsty Morag needed urgent black market top up@PeoplesFord #moragthecowcar pic.twitter.com/WOpCxUl4VE
— Morag The Cow Car (@MoragTheCowCar) August 7, 2017
Umuman, bu yilgi Mongol Rally’da 311 jamoa qatnashayotgan bo‘lib, poygada ishtirok etayotgan ko‘plab mashinalar hali O‘zbekistondan o‘tishi mumkin.
