AQSh prezidenti Donald Tramp uning Shimoliy Koreya raketa dasturiga qarshi kurashdagi harakatlarini qo‘llab-quvvatlagan boshqa mamlakatlarga Twitter’dagi sahifasi orqali minnatdorchilik bildirdi. Bu haqda “Gazeta.ru” xabar bermoqda.
“Ko‘p yillik muvaffaqiyatsizliklardan so‘ng, mamlakatlar Shimoliy Koreya tomonidan ko‘rsatilayotgan tahdidlarga javob qaytarish maqsadida va nihoyat birlashdi”, — deb yozdi AQSh prezidenti.
Trampning qayd etishicha, AQSh va boshqa mamlakatlar “nisbatan qattiqqo‘l va jur’atliroq bo‘lmog‘i lozim”.
5-avgust kuni BMT Xavfsizlik kengashi qit’alararo ikkita ballistik raketani uchirganiga javoban KXDRga nisbatan sanksiyalarni yanada kuchaytirish to‘g‘risidagi rezolyutsiyani bir ovozdan ma’qulladi. Mazkur qarorni ma’qullaganlar orasida Shimoliy Koreyaning an’anaviy ittifoqchilari — Rossiya va Xitoy ham bor.
Yaponiya Tashqi ishlar vazirligi vakili Tosixide Ando ham BMT tomonidan sanksiyalarning kuchaytirilishini olqishladi. U Pxenyan bilan muloqot o‘rnatishga intilish emas, balki unga “yanada samaraliroq bosim” o‘tkazish zarurligini ta’kidladi.