Samarqand viloyatida 2017-yilning olti oyida olti nafar ona va 283 nafar go‘dak o‘limi qayd etilgan. Bu haqda “Zarafshon” gazetasi tomonidan e’lon qilingan viloyat sog‘liqni saqlash boshqarmasi boshlig‘ining axborotida aytilgan.
Axborotda onalar va go‘daklar o‘limi 2017-yilning birinchi yarmida o‘tgan yilga nisbatan kamaygan bo‘lsa-da, bunday holatlarning oldini olish borasidagi ishlar talab darajasida yo‘lga qo‘yilmagani ta’kidlangan.
“Gazeta.uz”ning Davlat statistika qo‘mitasiga tayanib ma’lum qilishicha, 2017-yilning dastlabki olti oyida respublika bo‘yicha bir yoshgacha bo‘lgan bolalarning 3900 ta o‘limi qayd etilgan. Bolalar o‘limining yuqori ko‘rsatkichlari Toshkent, Xorazm, Andijon, Jizzax, Sirdaryo, Namangan viloyatlari va Qoraqalpog‘iston Respublikasida kuzatilgan.
Bir yoshgacha bo‘lgan bolalar o‘limi umumiy sonining 56,2 foizi perinatal davrda yuzaga kelgan holat sababli yuz bergan. Umumiy o‘limning 23,2 foizi nafas olish a’zolari kasalliklari sababli, 11,8 foizi tug‘ma anomaliyalar, 3 foizi yuqumli va parazitar kasalliklar, 1,3 foizi baxtsiz hodisalar, zaharlanish va jarohatlar, 0,2 foizi ovqat hazm qilish a’zolari kasalliklari, 4,3 foizi esa boshqa kasalliklar sababli yuzaga kelgan.
Izoh (0)