Xitoy 25 yil ichida O‘zbekistonga 9 mlrd dollar moliyaviy mablag‘ taqdim etdi
Xitoy O‘zbekistonning asosiy savdo va investitsion sherigidir. Bu haqda Xitoyning O‘zbekistondagi elchixonasi savdo-iqtisodiy masalalar bo‘yicha maslahatchisi Szin Yuylun aytib o‘tdi, deb yozadi UzDaily. Uning ma’lumotlariga ko‘ra, 25 yil ichida Xitoy O‘zbekistonga 9 milliard dollarlik kreditlar, grantlar va beg‘araz yordam taqdim etgan.
Uning ta’kidlashicha, 25 yil ichida Xitoy imtiyozli va tijorat kreditlari hisobidan O‘zbekiston elektr energetikasi, ko‘mir qazib chiqarish sanoati, gidroenergetika, kimyo sanoati, aviaqatnov, temir yo‘l transporti kabi sohalarda 60 dan ortiq loyihalarni amalga oshirgan va oshirmoqda.
Szin Yuylun so‘zlariga ko‘ra, Xitoy tomoni O‘zbekistonga ta’lim, tibbiyot, bojxona, madaniyat, qishloq xo‘jaligi, gidroinshootlar, xavfsizlik sohalarida 40 dan ortiq loyihalarni amalga oshirish uchun beg‘araz ko‘mak taqdim etgan.
Uning eslatishicha, bugungi kunda Xitoyning O‘zbekistondagi investitsiyalari umumiy hajmi 7,8 milliard dollardan oshadi. 700 dan ziyod Xitoy korxonalari va qo‘shma korxonalar O‘zbekiston hududida mamlakat xalq xo‘jaligining turli sohalarida o‘z faoliyatini olib bormoqda.
