Qo‘shma Shtatlarning xalqaro sahnadagi asosiy raqibi Rossiya yoki Eron emas, Xitoy hisoblanadi. Bu haqda MRB direktori Maykl Pompeo Washington Free Beacon nashriga bergan intervyusida ma’lum qildi, deya xabar berdi “TASS”.
“Mazkur uch davlatdan Xitoy Amerikaga o‘rta va uzoq muddatli istiqbolda eng ko‘p raqobat qilish salohiyatiga ega deb o‘ylayman. Xitoyda, yer ostidan necha barrel neft qazib olishiga qarab o‘ladigan va tiriladigan Rossiyadan farqli ravishda, o‘zi tomonidan qurilgan real iqtisod mavjud. Eron iqtisodiyotiga kelsak, u ham yetarlicha rivojlanmagan va salohiyati bo‘yicha Xitoyga teng kelolmaydi”, — ta’kidladi Pompeo.
MRB direktoriga ko‘ra, Xitoy AQSh harbiy kuchlariga qarshi turishga qaratilgan harbiy salohiyatini oshirib bormoqda. Shuningdek, Pekin “Amerika texnologiyalarini o‘g‘irlash yoki ular bilan raqobatda muvaffaqiyat qozonishga ishonch hosil qilishga, aksariyat hollarda esa unisiga ham, bunisiga ham urinadi”.
Pompeo Xitoyning razvedka sohasidagi ortib borayotgan imkoniyatlaridan ham tashvish bildirdi.
Izoh (0)