Birlashgan Arab amirliklarida dunyodagi eng og‘ir ayol hisoblanadigan Imon Ahmad Abdulatining vaznini kamaytirish bo‘yicha qayta operatsiya o‘tkazildi. Bu haqda UAE Inside xabar bermoqda.
500 kilogrammga yaqin tosh bosadigan Misrlik ayol dastlab Hindistonda, Mumbayda muvaffaqiyatli operatsiya qilingan va vaznining katta qismidan xalos bo‘lgandi. Biroq hind shifokorlari mijozni davolash va reabilitatsiya jarayonini davom ettira olmadi, shu sababli qayta operatsiyaga ehtiyoj tug‘ildi.
Burjeel Hospital kasalxonasi mutaxassislari Imonga yangi hayot baxsh etdi. To‘shakka mixlangan va o‘zini tutish imkoniga ega bo‘lmagan ayol endi o‘tirishi mumkin, uch yil avvalgi insultdan so‘ng ilk bor nutqi tiklanmoqda.
“Imonning qanchalik o‘zgarganini tasavvur etish ham qiyin. Uning yaqinlari bilan muloqot qilish imkoniga ega bo‘lgani oilasi uchun katta baxt bo‘ldi. Onasi va qarindoshi Imonni dastlab hatto tanimadi ham”, — deydi VPS raisi va boshqaruvchi direktori doktor Shamshir Vaylil.
Izoh (0)