BMT Xavfsizlik kengashi 24-iyul, dushanba kuni matbuot uchun uchta bayonotni qabul qildi, ularda Markaziy Afrika Respublikasidagi tinchlikparvarlarga hujumni, shuningdek, Afg‘oniston va Pokistonda sodir bo‘lib o‘nlab kishilarning hayotiga zomin bo‘lgan terrorchilik harakatlarini qoraladi, deb yozadi “TASS”.
Kobulda va Pokistonning Lahor shahridagi teraktlarga bag‘ishlangan bayonotlarda “har qanday shakl va ko‘rinishlardagi terrorizm xalqaro tinchlik va xavfsizlikka eng jiddiy tahdidlardan birini solishi”, shuningdek, “maqsadidan qat’i nazar” jinoyat hisoblanishi aytiladi.
Eslatib o‘tamiz, Pokistonning Panjob viloyati markazi Lahorda uyushtirilgan portlash oqibatida 26 kishi halok bo‘ldi, 53 kishi yaralandi.
Xudkush terrorchi tomonidan Afg‘oniston hukumati rahbarining o‘rinbosari Muhammad Muhaqqiqning uyi yaqinida transport vositasining portlatib yuborilishi oqibatida halok bo‘lganlar soni esa 35 kishiga yetdi.
Izoh (0)