Chempionlar xalqaro kubogi. London “Arsenal”i va nihoyat “Bavariya”dan ustun keldi

Londonning “Arsenal” hamda Myunxenning “Bavariya” klublari Chempionlar xalqaro kubogining Shanxaydagi turnesida to‘qnash keldi.

Bellashuvning asosiy vaqti 1:1 hisobidagi durang bilan yakunlandi. Hisob 9-daqiqada Robert Levandovskining penaltidan yo‘llagan aniq zarbasidan keyin ochilgandi. Asosiy vaqtning so‘nggi daqiqasida Aleks Ivobi “to‘pchilar”ni mag‘lubiyatdan qutqarib qoldi.

O‘yindan keyingi penaltilar seriyasida omad londonliklarga kulib boqdi va Venger jamoasi 3:2 hisobida ustun keldi.

Yevropa Chempionlar ligasining so‘nggi mavsumida mazkur ikki klub pley-offda to‘qnash kelgan bo‘lib, ham Myunxendagi, ham Londondagi o‘yinda “Bavariya” bir xilda — 5:1 hisobida zafar quchgandi.

Chempionlar xalqaro kubogi Shanxay, Xitoy 19-iyul, chorshanba

“Arsenal” — “Bavariya” 1:1 (pen — 3:2)