BMT: 2005-yildan beri OITSga yo‘liqqanlar orasidagi o‘lim darajasi ikki barobarga qisqardi

Oxirgi o‘n yil ichida jahon hamjamiyati OITSga qarshi kurashda muayyan yutuqlarga erishdi. Bu haqda BMTning OIV/OITSga qarshi birlashgan dasturi (UNAIDS) tomonidan chop etilgan hisobotda aytildi, deb xabar beradi “TASS”.

“2016-yili OIV bilan yashayotgan 36,7 million kishidan 19,5 million nafari davolanish imkoniyatiga ega bo‘ldi, OITS bilan bog‘liq o‘lim darajasi esa 2005-yildagi 1,9 million holatdan 2016-yili 1 million holatgacha qisqardi”, — deyiladi hujjatda.

Ayniqsa Afrika janubida katta yutuqlar qo‘lga kiritildi. Ushbu mintaqada butun dunyodagi OIVga yo‘liqqan odamlarning yarmi istiqomat qiladi. 2010-yildan mintaqada o‘lim darajasi 42 foizga, yangi xastalanish holatlari esa 29 foizga qisqardi.

Ekspertlarning ta’kidlashicha, agar jarayon davom etsa, 2020-yili 30 million kishining ushbu xastalikdan davolanishiga imkon tug‘iladi.