AQSh prezidenti Donald Tramp Venesuela yetakchisi Nikolas Maduro 30-iyulda ta’sis majlisini chaqirsa, AQSh “qat’iy iqtisodiy choralarni ko‘rishi”ni aytdi, deb yozadi “RIA Novosti”.
“Kecha Venesuela xalqi demokratiya, erkinlik va qonun ustuvorligi tarafdori ekanligini yana bir bora ko‘rsatib berdi. Shunga qaramay, ularning kuchli va jur’atli xatti-harakatlari hamon diktator bo‘lish orzusidagi yomon yetakchi tomonidan e’tiborsiz qoldirilmoqda”, — deyiladi Trampning bayonotida.
Uning ta’kidlashicha, “agar Maduroning rejimi 30-iyulda ta’sis majlisini chaqirsa, u holda AQSh qat’iy va tezkor iqtisodiy choralarni ko‘radi”.
O‘z navbatida AQSh davlat departamenti ham Venesuela hukumatini Milliy assambleya chaqirig‘ini bekor qilishga da’vat etdi.
17-iyul kuni Venesuelada rasmiy maqomga ega bo‘lmagan “xalq referendumi” o‘tkazildi. Unda 7,2 million kishi qatnashdi, ularning aksariyati prezident Nikolas Maduro tashabbusi bilan konstitutsiyaga o‘zgartirishlarni tayyorlash uchun ta’sis majlisi chaqirilishiga qarshi ovoz berdi. Hukumat ushbu ovoz berishning yuridik oqibatlarini tan olmayapti va ta’sis majlisiga saylovlar grafigiga o‘zgartirish kiritishni rejalashtirmayapti.
Izoh (0)