O‘zbekistonda Huawei kompaniyasiga tegishli Honor brendining so‘nggi flagman telefonlaridan biri — Honor 8 sotuvga chiqdi, deb yozadi “Mobinfo.uz”.
Qurilma ikkala tomondan ham qirralari aylana shisha rom bilan himoyalangan, sirtdan esa metall rom joylashgan. Orqa korpus presslangan material (15 qavat)dan tayyorlangan va 3D o‘yma naqsh effektiga ega. Quyoshga tutgan vaqtingizda unda turli-tuman naqshlarni ko‘rish mumkin.
Honor 8 5,2 dyuymli IPS-ekran, 8 yadroli Kirin 950 protsessori, 4 Gb tezkor xotiraga ega bo‘ldi. Qurilma Android 6.1 operatsion tizimi asosidagi EMUI 4.1 firma qobig‘ida ishlaydi.
Yangi 3D barmoq izi skaneri texnologiyasi sharofati bilan, Honor 8’ni blokdan chiqarish bor-yo‘g‘i 0,4 soniya vaqt oladi.
Shuningdek, telefon 8 megapikselli old va 12 megapikselli asosiy kamera, 3000 mA/soat sig‘imli akkumulyator bilan jihozlangan.
Toshkentdagi “Malika” savdo markazida Honor 8 (4 Gb tezkor va 32 Gb doimiy xotirali) 3,9 million so‘mga taklif qilinmoqda.
Ushbu qurilmani ko‘rsatilgan narxda sotib olishga “Daryo” nashri kafolat bermaydi. Qurilma va uning narxi haqidagi axborot faqat tanishish uchun taqdim etilgan.
Izoh (0)