23 yoshgacha bo‘lgan futbolchilar o‘rtasidagi Osiyo chempionatida o‘ynash uchun harakat qilayotgan O‘zbekiston terma jamoasi saralashning 2-turida ham zafar quchdi.
Nepal olimpiyachilariga qarshi maydonga tushgan Ravshan Haydarov murabbiyligidagi jamoa 2:0 hisobida zafar quchdi. Hisob himoyachi Doston Tursunov tomonidan ochilgan bo‘lsa, keyinroq “Nasaf”ning Yevropa klublari qiziqayotgan a’zosi Aziz G‘aniyev ikkinchi golga mualliflik qildi.
Nepal ilk turda saralash mezboni BAA bilan o‘ynab, 0:5 hisobida imkoniyatni boy bergandi. O‘zbekiston terma jamoasi esa 1 ta avtogol hamda “Nasaf” hujumchisi Bobur Abduxoliqovning dubli sabab Livanni taslim qilgandi — 3:1.
Shu tariqa Nepal Osiyo chempionatidan chetda qoldi. O‘zbekiston hal qiluvchi o‘yinni 19-iyul kuni Amirlik termasiga qarshi o‘tkazadi. O‘z navbatida BAA olimpiyachilari bir necha soatdan keyin Livanga qarshi o‘yinni yakunlaydi.
Turnir reglamentiga ko‘ra, guruh peshqadamlari Osiyo chempionatiga to‘g‘ridan-to‘g‘ri yo‘llanma oladi. 10 ta guruhning eng yaxshi ko‘rsatkichli 2-o‘rindagi besh jamoasiga ham shunday baxt nasib qiladi.
Asian Championship U23 Saralash. “D” guruhi. 2-tur 17-iyul, dushanba
BAA — Livan
Izoh (0)