Angliyaning Bristol shahrida istiqomat qiluvchi qiz o‘zining o‘g‘rilab ketilgan velosipedini Facebook orqali sotmoqchi bo‘lgan shaxsdan o‘g‘rilab ketdi. Bu haqda Bristol Post’ga tayanib, “RIA Novosti” xabar berdi.
Jenni Morton-Xemfris nonushta qilish maqsadida velosipedini shahar markazidagi Watershed mediamarkazida qoldirgan. Qaytib kelgach esa velosipedi o‘g‘rilab ketilganini ko‘rgan va politsiyaga xabar bergan.
Shundan so‘ng qiz Facebook’ka velosipedining suratini joylashtirgan va uni topishda yordam so‘ragan. Ijtimoiy tarmoq foydalanuvchilardan biri qizning o‘g‘rilangan transport vositasi sotilayotgani haqidagi e’lonni ko‘rib qolgan.
Jenniga tuzoq qo‘yishni va e’longa javob berishni taklif qilishgan. U politsiyadan “sotuvchi” bilan bo‘ladigan uchrashuvga birga borishni va uni qo‘lga olishni so‘ragan, biroq rad javobini olgan. Shunda u o‘zining velosipedini o‘g‘rilik yo‘li bilan qaytarib olishga qaror qilgan.
Qiz e’lonning egasi bilan belgilangan uchrashuv joyiga do‘sti hamrohligida kelgan.
“Men o‘zimni xaridordek tutdim va unga velosiped haqida turli bema’ni savollar berdim”, — dedi Jenni.
Jenni velosipedni haydab ko‘rish uchun “sotuvchi”ga bir quti sigaret hamda kalitlarini garov sifatida topshirgan. Shundan so‘ng Jenni o‘zining ikki g‘ildirakli “do‘stiga” o‘tirgan va tezda jo‘nab qolgan.
Bristol Post’ning ma’lumotlariga ko‘ra, “bitim”da ishtirok etgan Jennining do‘stini aytishicha “sotuvchi” biroz vaqt dovdirab turgan, shundan keyin kimdur “u endi qaytmaydi” deya baqirgach, Jenni tashlab ketgan “qimmatli buyumlar”ni tekshirib ko‘rgan va sigaret qutisi bo‘sh ekanligini, kalitlardan esa baribir foydalanishning iloji yo‘q ekanligini tushungan.
Unga tashlab ketilgan kalitlar 18 soat oldin Jennining velosipedini zanjiriga o‘rnatilgan qulfniki bo‘lgan.
Izoh (0)