Turkiya hukumati mamlakatda harbiy to‘ntarishni amalga oshirishga qilingan harakatdan so‘ng joriy etilgan favqulodda holat doirasida 7 ming nafardan ortiq huquq-tartibot xodimlari va davlat xizmatchilarini ishdan bo‘shatish haqidagi qarorni e’lon qildi. Bu haqda mahalliy OAVga tayanib, “Interfaks” xabar berdi.
Ishdan bo‘shatilganlar orasida politsiya xodimlari, harbiy va davlat xizmatchilari bor. Ta’kidlanishicha, 2,3 mingdan ortiq politsiyachi xizmatdan chetlatilgan.
Ushbu qaror Turkiyada sodir bo‘lgan fitnaga bir yil to‘lishidan bir kun oldin e’lon qilindi.
Turkiyada harbiy to‘ntarishga urinish 2016-yilning 16-iyulga o‘tar kechasi sodir bo‘lgan, biroq qo‘zg‘olonchilarning rejasi amalga oshmagan edi. Anqara fitnani tashkillashtirishda AQShda istiqomat qilayotgan muxolifatchi Fathulloh Gulenni ayblagan edi.
Harbiy to‘ntarishga harakatdan so‘ng, Turkiya hukumati 50 mingga yaqin odamni hibsga olgan va yana 100 ming odamni egallab turgan vazifasidan vaqtincha yoki butunlay ozod etgan edi.
Izoh (0)