Moskva okrug harbiy sudi muxolif siyosatchi Boris Nemsovning qotilligi haqidagi ish yuzasidan hukm o‘qidi. Bu haqda Meduza xabar bermoqda.
Sud tomonidan qotillikning bevosita ishtirokchisi deb tan olingan Zaur Dadayev og‘ir tartibli koloniyada o‘tash sharti bilan 20 yillik qamoq jazosiga hukm etildi. Eslatib o‘tamiz, ayblov unga umrbod jazo belgilashni so‘ragan edi.
Shuningdek, u leytenant unvonidan hamda Jasorat ordenidan mahrum qilindi.
Ish bo‘yicha aybdor deb topilgan boshqa shaxslarga ham qamoq muddatlari belgilandi: Anzor Gubashev og‘ir tartibli koloniyada o‘tash sharti bilan 19 yillik, uning ukasi Shadid 16 yillik qamoq jazosiga hukm qilindi.
Shuningdek, Temirlan Eskerxanov og‘ir tartibli koloniyada o‘tash sharti bilan 14 yilga qamaladigan bo‘ldi. Xamzat Baxayev 11 yillik jazo oldi.
Sudlanuvchilar ayblarini tan olmadi. Ularning advokatlari apellyatsiyaga berishga hozirlanmoqda.
Izoh (0)