Qashqadaryolik chaqaloq Muhammadjon Rashidov 11-iyul kuni vafot etdi. U 2017-yilning 14-may kuni tug‘ilgan edi.
11-iyulga o‘tar kechasi chaqaloqning ahvoli og‘irlashgan. Erta tongdan Muhammadjonni Toshkentdan yetib borgan mutaxassislar ishtirokida qayta operatsiya qilish bo‘yicha maslahatlashuvlar olib borilgan. Biroq chaqaloqning joni operatsiyagacha uzilgan.
Kasallik tarixi
Muhammadjonning buvisi Nargiza Qurbonovaning so‘zlariga ko‘ra, chaqaloqning ahvoli 16-maydan yomonlashgan. Qashqadaryo viloyat sog‘liqni saqlash boshqarmasi boshlig‘i To‘lqin Rasulovning ma’lum qilishicha, bola 10-iyun kuni og‘ir ahvolda, “Markaziy nerv tizimining perinatal zararlanishi. Chaqaloqlar gemolitik kasalligi. Homila ichi infeksiyasi” tashxisi bilan viloyat bolalar ko‘p tarmoqli tibbiyot markazi jonlantirish bo‘limiga qabul qilingan.Bolaning ahvoli og‘irligicha qolgani, qo‘shimcha ravishda qorin taranglashishi, dam bo‘lishi, qorinning kattalashishi, ich kelmasligi, tana haroratining ko‘tarilishi, qayt qilish kabi belgilar kuzatilgan. Shundan so‘ng chaqaloqqa “Yarali nekrotik enterokolit, yo‘g‘on ichak stenozi, peritonit” tashxisi ham qo‘yilgan. Shundan so‘ng chaqaloqni operatsiya qilishga qaror qilingan. Operatsiya 28-iyun kuni bo‘lib o‘tgan.
Operatsiyadan so‘ng chaqaloqqa “Sepsis. Homila ichi infeksiyasi. Yarali nekrotik-gangrenoz total enterokolit. Yo‘g‘on ichaklar va ingichka ichak yaralarining perforatsiyasi. Tarqalgan najasli-yiringli-fibrinli peritonit. Endotoksikoz” tashxislari qo‘yilgan. Muhammadjon Rashidovning ahvoli OAV va internetda ma’lum qilinganidan so‘ng, 6-iyuldan bolalar tibbiyot markazining alohida, konditsionerli xonasiga ko‘chirilgan, unga bir shifokor, bir hamshira va bir sanitar biriktirilgan.
Mavzuga doir: Qashqadaryolik Muhammadjon konditsionerli palataga o‘tkazilgan, unga “avvalgidan yaxshi qarashmoqda”
Unga “O‘lmasjon” deb yangi ism berishgan edi...
Muhammad Rashidov voqeasida jamoatchilik e’tiborini tortgan asosiy jihatlardan biri, bu — chaqaloq 28-iyundagi operatsiyadan so‘ng shifokorlar tomonidan “vafot etgan” deb, yaqinlariga topshirilgani, so‘ng janozasi vaqtida “jonlangani” bilan bog‘liq hodisadir. Aynan shu sababli ham ijtimoiy tarmoqlarning foydalanuvchilari chaqaloqqa “Hayotbek”, “O‘lmasjon” kabi yangi ismlar bergan edi.Mavzuga doir: Mayit yuvuvchining qo‘lida “jonlangan” bir yarim oylik go‘dak. Qashqadaryolik Muhammadjonning hayoti saqlab qolinadimi?
Biroq Sog‘liqni saqlash vazirligi saytida keltirilgan voqea soatlari bilan bevosita hodisa guvohi bo‘lgan fuqarolarning bildirgan ma’lumotlari o‘rtasida nomuvofiqliklar, ziddiyatlar bor. Xususan, janozada bo‘lgan Qarshi tumani Quyi Beshkent jome’ masjidi imom-xatibi chaqaloqning tirik ekani shom namozi arafasida ma’lum bo‘lganini, voqeadan xabardor shifokorlardan biri esa chaqaloq soat 22:00 bo‘lmay shifoxonaga qaytarib olib kelinganini “Daryo”ga ma’lum qilgan edi.
“Daryo” internet-nashri tahririyati Muhammadjon Rashidovning yaqinlariga chuqur hamdardlik bildiradi.
Izoh (0)