Rossiya prezidenti Vladimir Putin Yekaterinburg shahriga tashrifi davomida o‘z kortejidagi mashinada Yaponiya sobiq bosh vaziri Yosixiro Morini sayr qildirdi. Bu haqda “RIA Novosti” xabar bermoqda.
Mori Rossiya prezidenti bilan 9-iyul, yakshanba kuni, Yekaterinburgdagi “Innoprom” ko‘rgazmasida uchrashdi. Yaponiya mazkur tadbirning asosiy sherigi hisoblanadi.
Putin va Mori 1,5 soat davomida muloqotda bo‘ldi. Sobiq bosh vazir jurnalistlarga Putindan imkon boricha tezroq Yaponiya bilan tinchlik shartnomasi imzolashni so‘raganini ma’lum qildi. Yaponlar buning uchun Moskva ularga Kuril orollarini berishi lozim, deb hisoblaydi.
Ko‘rgazmada Putin Nissan kompaniyasi stendi oldida to‘xtadi va o‘tgan asrning 90-yillarida, Sankt-Peterburg meriyasidagi ishi davomida shu markadagi avtomobilda yurgani, mashina o‘shanda unga juda yoqqanini esladi.
Izoh (0)