Amerikalik maktab o‘quvchi Teddi Fisher AQSh Mudofaa vaziri Jeyms Mettisning telefon raqamini topib unga qo‘ng‘iroq qilibgina qolmay, Mettisdan 45 daqiqali intervyu olishga ham muvaffaq bo‘ldi. Bu haqda New York Post gazetasiga tayanib, “RIA Novosti” xabar berdi.
Uning ma’lumotlariga ko‘ra, Vashingtonda istiqomat qiladigan yosh yigitcha Washington Post gazetasining 11-may sonidagi suratda Pentagon rahbarining telefon raqamini ko‘rib qolgan. Suratda AQSh prezidenti Donald Trampning soqchilaridan biri — Kit Shiller bir bog‘lam qog‘ozni olib ketayotganini, unda Mudofaa vazirining ismi va telefon raqami ko‘rinib qolganini payqash mumkin bo‘lgan.
Keyinroq, surat gazetaning saytidan o‘chirib tashlangan, biroq Fisher uni ko‘rishga ulgurib qolgan. “Bularning barchasi mo‘jizalar maydonini eslatadi”, — dedi u vazir bilan bo‘lib o‘tgan intervyudan so‘ng mahalliy telekanallardan biriga.
Avvaliga yigitcha Mettisga intervyu berishini so‘rab matnli xabar jo‘natgan. Asli vashingtonlik bo‘lgan vazir bunga rozi bo‘lgan. Intervyu Fisher o‘qiydigan maktab gazetasida chop etilgan.
Unda Mettis doim maktab o‘quvchilariga yordam berishini va o‘z tajribasini ular bilan bo‘lishini tan olgan. New York Post ma’lumotlariga ko‘ra, Mettis suhbatda bir qator tashqi siyosiy masalalar haqida gapirgan. Xususan, u AQSh sobiq prezidenti Barak Obama davlat kotibi Hillari Klintonning gaplariga quloq osganida ko‘proq muvaffaqiyatga erishgan bo‘lar edi, deya ta’kidlagan. Shuningdek, Mettis agarda AQSh Afg‘oniston, Suriya yoki boshqa mamlakat bolalarining Amerika maktablarida yillik o‘qishi pulini to‘lab berganida radikal mafkuralar tarqalishiga qarshi kurash osonroq kechgan bo‘lardi, deya qo‘shimcha qilgan.
Izoh (0)