Facebook ijtimoiy tarmog‘ining toshkentlik foydalanuvchisi Sabina Qodirova o‘zi turadigan hududda ro‘y bergan fojia haqida yozib qoldirdi. Uning hikoyasi ijtimoiy tarmoqning turli guruhlarida, shu jumladan, “Xalq bilan muloqot” guruhida tarqalib ketdi va qizg‘in bahslarga sabab bo‘ldi.
Uning so‘zlariga qaraganda, 8-iyul kuni soat 12:00–13:00 orasida “Tashselmash” massivida transformator budkasida portlash ro‘y berib, yong‘in kelib chiqqan. Yashnobod tuman elektr tarmoqlari ta’mir brigadasi voqea joyiga yetib kelgan. Foydalanuvchining so‘zlariga qaraganda, ular “texnika xavfsizligiga rioya qilmay, himoya vositalari va kiyimlarisiz, elektr uzatishni o‘chirmay turib” budkani ochgan va unda ishlay boshlagan.
Ish jarayoni davom etayotgan paytda soat 17:50 yana portlash ro‘y bergan va yong‘in yanada avj olgan. Ishchilardan biri kuchli kuyish jarohatlarini olgan, qolganlari esa portlash zarbi bilan chetga uloqtirib yuborilgan. Massiv aholisi darhol tez tibbiy yordam chaqirtirgan.
Tez yordam mashinasi 30–40 daqiqadan so‘ng yetib kelgan. Unga qadar mahalliy aholi vakillarining o‘zlari jabrlangan ishchiga yordam ko‘rsatgan. Tibbiyot xodimlari esa, Sabina Qodirovaning so‘zlariga qaraganda, hech qanday yordam ko‘rsatmagan va chetdan turib jarayonni kuzatgan. Keyinroq yana “MDS” klinikasidan ikki tez tibbiy yordam mashinasi kelgan, ammo ular boshqa shifokorlar borligini aytib, voqea joyini tezda tark etgan. Oqibatda jabrlanuvchi olamdan o‘tgan.
“Bu 26–27 yoshli yigit edi. Odamlarni hayot uchun xavfli obyektlarda ishlash uchun oddiy xavfsizlik texnikasiga amal qilmasdan yuboradigan tuman elektr tarmoqlari rahbariyatining beparvoligi, tez tibbiy yordam xodimlarining insonga nisbatan bee’tiborligi odamning g‘azabini keltiradi”, — deyiladi xabarda.
Ushbu voqea Facebook’dagi qator guruhlarda tarqalib, qizg‘in bahslarga sabab bo‘lmoqda. Kimdir tez tibbiy yordam xodimlarining, yana kimdir elektr tarmoqlari rahbariyatining beparvoligiga urg‘u bersa, yana kimlardir oddiy xavfsizlikka rioya qilmagan xodimlarda barcha ayb deb hisoblamoqda.
“Hayronman, nega tez yordam yarim soatdan keyin keldi, tushunmayapman???”, — deb savol tashladi muhokamalar ishtirokchilaridan biri.
“Sog‘liqni saqlash vazirligi qayerga qarayapti? Yoki ularga kim rahbarlik qilyapti? Ularning Gippokrat qasami ichgani qayerda qoldi?”, — deb o‘z noroziligini ifodaladi boshqa foydalanuvchi.
Ayrimlar massiv vakillarida ham ayb borligini aytib o‘tdi.
“U yerda odamlar yarim soat yigitning ahvoli yomonlashishini kuzatib o‘tirdi, yigit esa ular uchun harakat qilayotgan edi. Deyarli barchasida mashina bor, lekin mashinani iflos qilgisi kelmaydi, hatto taksida ham shifoxonaga olib borish mumkin edi”, — deyiladi izohlardan birida.
Izoh (0)