Britaniya huquq-tartibot xodimlari 7-iyul, juma kuni 19 yoshli yigitni 23-may kechasi Manchesterda sodir bo‘lgan terakt ishi yuzasidan qo‘lga oldi. Bu haqda Katta Manchester grafligi politsiyasi Twitter’da ma’lum qildi, deb xabar berdi “TASS”.
“7-iyul, juma kuni 19 yoshli yigit Liverpulda joylashgan Jon Lennon nomidagi aeroportda qo‘lga olindi”, — deyiladi xabarda. Shuningdek, politsiyaning ma’lum qilishicha, Manchester bilan qo‘shni joylashgan ulkan shahardagi havo kemasida hibsga olinagan yigit, Britaniya antiterror qonunchiligini buzishda va “Manchester Arena’ga uyushtirilgan hujumning tergovi”ga bog‘liqlikda gumonlanmoqda.
Qo‘lga olingan shaxs hozircha hibsda. Manchesterning Falloufild hududida joylashgan Teluoll-avenyu ko‘chasidagi uylardan birida tintuv ishlari olib borilmoqda. Biroq politsiya tintuv o‘tkazilayotgan uy qo‘lgan olingan gumonlanuvchiga bog‘liq yoki yo‘qligi borasida hech narsa demadi.
Politsiyaning ma‘lum qilishicha, Manchesterdagi terakt yuzasidan qo‘lgan olinganlar soni 23 nafarga yetgan. Biroq bundan oldingi 22 nafar gumonlanuvchi hech qanday ayblovlarsiz qo‘yib yuborilgan edi.
Eslatib o‘tamiz, 22-may oqshomida Manchester shahrida Ariana Grandening Manchester Arena yopiq stadionida tashkil etilgan konserti vaqtida portlash yuz berishi oqibatida 22 kishi halok bo‘lgandi.
Izoh (0)