So‘nggi bir haftadan beri O‘zbekistonning aksariyat hududlari singari poytaxt Toshkentda ham havo harorati yuqori darajada bo‘lib turibdi. Ma’lumotlarga ko‘ra, bunday jazirama 11-iyulga qadar davom etishi mumkin.
Aksiga olib, 8-iyul kuni Toshkent shahrining bir qator chorrahalarida svetoforlarning ishlamay qolishi holatlari kuzatildi. Xususan, Nurafshon va Sebzor ko‘chalari kesishmasi — Sebzor chorrahasida 7-iyul oqshomida ham svetoforlar ishlamayotgan edi.
Svetofor ishlamasa, avtomobillar harakati jadal bo‘lgan chorrahalarga tartibga solish uchun yo‘l nazoratchilari yuboriladi. 8-iyul kuni Sebzordagi muammoli chorrahaga yuborilgan yo‘l nazoratchisi ijtimoiy tarmoqlarda kun qahramoniga aylandi.
“Daryo” mobil muxbirlaridan birining ma’lum qilishicha, u 10:35 da shu chorrahadan o‘tgan vaqti xuddi shu nazoratchi harakatni tartibga solib turgan bo‘lgan. Oradan salkam to‘rt soat o‘tib — 14:15 da yana shu chorrahaga kelganida, nazoratchi hali ham xizmat joyida bo‘lgan.
“Ko‘zimning oldida bir Spark uning oldida to‘xtab, militsionerga energetik ichimlik berib ketdi. Suvni oldi-yu, oyog‘i ostidagi plastik idishning yoniga qo‘yib, harakatni tartibga solishda davom etdi. Oftobdan qizarib ketgan edi. Oson emas bunday jaziramada to‘rt soat quyoshda turish!”, — deydi “Daryo” mobil muxbiri.
Facebook’dagi “Voditeli Tashkenta” va “Voditeli Tashkenta (Drivers.uz)” guruhlarida ushbu yo‘l nazoratchisi haqida bunday iliq fikrlarni ko‘plab uchratish mumkin.
Mavzuga doir: Yaponiyada jazirama sabab 600 dan ortiq odam kasalxonaga yotqizildi. Tokioda havo harorati +33,7 darajagacha ko‘tarilgan
Juda ko‘plab foydalanuvchilar ismi noma’lum yo‘l nazoratchisiga “Rahmat!”, “Baraka top!”, “Qahramon!”, deb minnatdorchilik bildirgan, uni olqishlagan. Oftob zarbidan zararlanishi mumkinligini aytib, uning ahvolidan xavotir olganlarni ham talay topish mumkin.
O‘z navbatida, bir guruh foydalanuvchilar shaharning boshqa nuqtalarida ham yo‘l nazoratchilari jaziramada ishlayotganini ma’lum qilgan. “O‘z ishini qilyapti-da, nimasiga rahmat aytish kerak?”, — deganlar ham bor. “Obodonlashtirish xizmati xodimlari ham shu issiqda 600 ming maoshga ishlab yuribdi. Biroq hech kim ularni internetda olqishlayotgani yo‘q”, — deb kuyungan yana bir foydalanuvchi.
Izoh (0)