Joriy yilning 12—17-iyun kunlari davomida “Taraqqiyot strategiyasi” markazi tomonidan “Notariat idoralari xalqqa xizmat qilishi kerak” mavzusida jamoatchilik fikri so‘rovi o‘tkazilgan edi.
Sohadagi muammolarni tahlil qilish va aholi, tadbirkorlik subyektlari, keng jamoatchilikning notariat sohasidagi fikr-mulohazalarini o‘rganish maqsadida o‘tkazilgan so‘rovda O‘zbekiston Respublikasining barcha hududlaridan jami 1104 nafar respondent ishtirok etdi. Ishtirokchilarning ko‘pchiligini 58,1 foizini Toshkent shahri tashkil qildi. So‘ralgan fuqarolarning 15,1 foizini xotin-qizlar va 84,9 foizini erkaklar tashkil etdi.
Jamoatchilik fikri so‘rovi shuni ko‘rsatdiki, so‘rov o‘tkazish paytida mamlakat fuqarolarining ko‘pchiligi (32,1 foiz) so‘rov o‘tkazilgan vaqtga nisbatan notarial idoralar xizmatidan oxirgi bir oy ichida foydalanganlar. So‘ralganlarning 21,6 foizi oxirgi uch oy ichida, 15,3 foizi oxirgi olti oy ichida, 26 foizi oxirgi bir yil ichida, 0,2 foizi foydalanmaganligi aniqlandi.
Jamoatchilik fikri so‘rovini o‘tkazish jarayonida notarial idoralar tomonidan xizmat ko‘rsatish tartib-taomillari, notarial xizmatlar uchun olinadigan davlat boji miqdorlari haqida fuqarolarning qay darajada axborotga ega ekanliklari so‘raldi. So‘rovning natijalariga ko‘ra, respondentlarning 33,4 foizi (369 nafar) notarial idoralar tomonidan xizmat ko‘rsatish tartib-taomillarini, notarial xizmatlar uchun olinadigan davlat boji miqdorlarini bilmasliklari, 33,1 foizi (365 nafar) bilishlari, 24,2 foizi (267 nafar) notarial xizmatga ishlari tushganda konsultatsiya olib, bilib olishlarini bildirishgan.
Respondentlarning 5,3 foizi (59 nafar) javob berishga qiynalganlar, 4 foizi (44 nafar) esa javob bermaslikka qaror qilganlar.
Tez kunlarda o‘tkazilgan jamoatchilik fikri so‘rovining yana boshqa natijalari bilan keng jamoatchilikni xabardor qilish markazida O‘zbekiston Respublikasi Adliya vazirligining tegishli mutassaddilari anjumani o‘tkazilishi rejalashtirilgan.