BMT Xavfsizlik kengashining ayrim a’zolari Rossiya bilan yozishmalarni OAVga berib yuborishdek xunuk ko‘rinishlarga yo‘l qo‘ymoqda. Bu haqda Rossiyaning BMTdagi doimiy vakilligi ma’lum qildi, deya xabar beradi “Gazeta.ru”.
Reuters agentligi Rossiya Xavfsizlik kengashining Shimoliy Koreya tomonidan oxirgi ballistik raketa uchirilishini qoralovchi bayonoti loyihasiga qarshi chiqqanini ma’lum qilgandi. Xabar sarlavhasida Rossiya mazkur bayonot qabul qilinishini blokirovka qilgani bildirilgan.
“Rossiya bayonot qabul qilinishini ‘blokirovka’ qilgani haqida gapirish haqiqatdan yiroq bo‘lar edi. Reuters keltirgan iqtibos to‘g‘ri va u Rossiyaning fikrini bildiradi. Muammo shundaki, u Xavfsizlik kengashiga a’zo davlatlar koordinatorlari o‘rtasidagi yozishmadan olingan. Hujjatni kelishish bo‘yicha odatiy jarayon ketayotgandi. Ochiq manbalarda bunday hujjatlardan iqtibos keltirilishi taajjub uyg‘otadi”, — deyiladi vakillik bayonotida.