Toshkentning “Paxtakor” klubi braziliyalik futbolchi bilan shartnoma tuzdi, deb yozdi “Championat.asia” nashri.
1987-yilning 17-fevral kuni tavallud topgan Tiago Keyrush Bezerra hujumchi ampluasida to‘p suradi. U Braziliya poytaxtida dunyoga kelgan va faoliyatining asosiy qismini Turkiya klublarida o‘tkazgan.
Bezerraning so‘nggi jamoasi “Adana Demirspor” hisoblanadi. Transfermarkt ma’lumotiga ko‘ra, hujumchining narxi 400 ming yevroni tashkil qiladi. Ammo u “Paxtakor” safiga erkin agent sifatida yetib kelgan.
“Paxtakor” bosh murabbiyi Shota Arveladze Turkiyada faoliyat olib borgani uchun, mahalliy klublar haqida yaxshi ma’lumotga ega.
Tiago Keyrush futbolchilik davrida 214 ta o‘yin o‘tkazgan va 69 ta gol urishga muvaffaq bo‘lgan.
“Paxtakor” bungacha chernogoriyalik himoyachi Marko Simich bilan 2,5 yillik shartnoma imzolagan bo‘lsa, keyinroq isroillik yarim himoyachi Gidi Kanuk bilan muzokara o‘tkazayotgani borasida xabar chiqqandi.