Chimyon tog‘ida yo‘qolgan fuqaro qidirilmoqda

2017-yil 5-iyul kuni Toshkent viloyati Favqulodda vaziyatlar boshqarmasi navbatchilik qismiga kelib tushgan ma’lumotga ko‘ra, Chimyon tog‘ yon bag‘rida fuqaro B. Kadateskiy yo‘qolganligi haqida turmush o‘rtog‘i Snejana tomonidan xabar berilgan. Bu haqda FVV matbuot xizmati ma’lum qildi.

Snejananing aytishicha, B. Kadateskiy qo‘ng‘iroq qilib, oyog‘i singani va FVV tomonidan yordam kerakligi haqida xabar bergan. Shu bilan birga u toqqa chiqish yo‘nalishini hech kim bilan kelishmay maxsus tog‘ga chiqish anjomlarisiz va ko‘nikmalarsiz piyoda ketganligi aniqlandi. Ushbu xabar olingan zahoti Favqulodda vaziyatlar vazirligi tomonidan qidiruv-qutqaruv ishlari uchun 3 ta guruh ajratilgan.

6-iyul kuni esa qidiruv ishlariga O‘zbekiston Respublikasi Mudofaa vazirligiga qarashli aviatsiya kuchlari jalb qilindi.

Hozirgi paytda qidiruv-qutqaruv ishlari davom etmoqda.