BMT oziq-ovqat va qishloq xo‘jaligi tashkiloti (Food and Agriculture Organization, FAO) hamda Butundunyo meteorologiya tashkiloti (World Meteorological Organization, WMO) mayda fermer xo‘jaliklarini qurg‘oqchilik mavsumiga tayyorlashga yordam berishga qaratilgan anglashinuv memorandumini imzoladi. Bu haqda “TASS” xabar bermoqda.
Mazkur hujjatda, jumladan, WMO qurg‘oqchilikning oldini olish bo‘yicha milliy muassasalarga tavsiyalar va ilmiy ma’lumotlar berishi ko‘zda tutilgan.
FAO bosh direktori Joze Gratsiano da Silvaga ko‘ra, mayda fermerlarning aksariyatida qurg‘oqchilik mavsumiga tayyorgarlik ko‘rish uchun mablag‘ yo‘q. Davlat favqulodda vaziyatlarga munosabat bildiradi, biroq ularning oldini olish choralarini ko‘rmaydi.
“Qurg‘oqchilikka duch kelgan fermerlarda jon saqlash va kelgusida yana taraqqiy etish uchun imkoniyat bo‘lishi zarur. Biz jahon hamjamiyatini nafaqat joriy muammolar haqida o‘ylash, balki kelajakni ham ko‘ra bilishga chaqiramiz. Mayda xo‘jaliklarni moliyaviy jihatdan qo‘llab-quvvatlash lozim”, — dedi Qishloq xo‘jaligini rivojlantirish xalqaro fondi prezidenti Jilber Ungbo.
Ma’lumot uchun, o‘tgan asrning 70-yillaridan beri qurg‘oqchilikdan jabrlangan yerlar maydoni ikki barobar ko‘paydi. Tabiiy ofat har yili 8 milliard dollargacha zarar keltiradi.
Izoh (0)