Buyuk Britaniyaning SAS maxsus kuchlar bo‘linmasi xodimlari Afg‘onistonda qurolsiz aholini 2010—2013-yillarda o‘ldirib kelganligini yashirgan. Bu haqda harbiy politsiyadagi manbalarga tayanib, The Times ma’lum qildi, deya xabar beradi “TASS”.
Gazetaga ko‘ra, SAS’ning kamida bitta otryadi “Tolibon” guruhi bilan aloqalarda gumon qilingan tinch aholi uylariga tungi reydlar davomida ularni qo‘lga olish o‘rniga sovuqqonlik bilan o‘ldirgan.
Britaniya maxsus bo‘linmasi xodimlari o‘z hisobotlarida qo‘shma operatsiyalar davomida otishmalarga asosan Afg‘oniston maxsus xizmatlari qo‘l urganini ko‘rsatgan. Biroq ayrim qurbonlar jasadlarida Britaniya armiyasida qo‘llanadigan patronlar o‘qi topilgan.
2014-yilda boshlangan va Nortmoore degan kodli nom olgan tekshiruv Britaniya maxsus xizmatlari tomonidan 2010-yildan 2013-yilgacha amalga oshirgan 675 ta noqonuniy harakatni o‘z ichiga oladi.
Buyuk Britaniya mudofaa vazirligi mazkur holatlarning 90 foizdan oshig‘ini tekshirish to‘xtatilgani va hozirda 10 tadan kamroq holat o‘rganilayotganini ta’kidladi. Tergov 2021-yilgacha davom etishi lozim edi, biroq vazirlik ularning asosiy qismi bo‘yicha shu yil yozida xulosa berishni talab qildi.
Izoh (0)