Ravon R2 va Ravon Nexia Rossiyadagi eng arzon mashinalar ro‘yxatiga kirdi

Rossiya avtoekspertlari mamlakat bozoridagi eng arzon mashinalar reytingini tuzdi. Bu haqda 1News xabar bermoqda.

Unda birinchi o‘rinni Xitoyning Lifan Smily xetchbeki 369900 rubl narx bilan egalladi. Undan keyingi o‘rinlarda Rossiyaning Lada brendi — Granta, Priora sedanlari va Granta liftbeki turibdi. Bu mashinalarning narxlari tegishli ravishda 389900, 399900 va 414900 rublni tashkil etadi.

Undan keyingi o‘rinda turgan Datsun on-DO mashinasining (Yaponiya) qiymati 439000 rublni tashkil qildi.

Eng arzon markalar topiga, shuningdek, O‘zbekistonning Ravon R2 xetchbeki, Lada Kalina, Ravon Nexia hamda Xitoyning FAW Oley va Brilliance avtomobillari kirdi.