O‘zbekistonda 30-iyun Yoshlar kuni deb e’lon qilindi

“Kamolot” YoIHning IV qurultoyida ishtirok etgan O‘zbekiston Prezidenti Shavkat Mirziyoyev mamlakatda O‘zbekiston yoshlar ittifoqini tashkil etish taklifini bildirdi. Shu bilan bir qatorda, davlat rahbari ittifoq faoliyati bilan bog‘liq bir qator takliflarni ham aytib o‘tdi.

Jumladan, O‘zbekiston yoshlar ittifoqi tashkil etilgan kun – 30-iyun sanasini O‘zbekistonda Yoshlar kuni deb e’lon qilish taklifi davlat rahbari tomonidan bildirildi.

Qizlarning huquq va manfaatlarini himoya qilish, iste’dod va qobiliyatini yuzaga chiqarish, ular orasida haqiqiy yetakchilarni tarbiyalash ishlarini yanada kuchaytirish maqsadida qizlar uchun alohida nashr – “Qizlarjon” yoki “Dugonalar” nomli yangi jurnal tashkil qilishning maqsadga muvofiqligi qayd etildi.

Aholi, eng avvalo, yoshlar o‘rtasida kitobxonlik saviyasini oshirish maqsadida Qoraqalpog‘iston Respublikasi, viloyatlar va Toshkent shahrida har yili “Eng kitobxon maktab”, “Eng kitobxon mahalla”, “Eng kitobxon oila” kabi yo‘nalishlarda tanlovlar o‘tkazish, yakuniy bosqich g‘oliblarini taqdirlash uchun qimmatbaho sovg‘alar, jumladan, O‘zbekistonda ishlab chiqarilgan avtomobillarni mukofot tariqasida berish masalasi ko‘tarildi.

Prezident o‘z nutqida yana bir muhim loyiha – 2020-yil 1-dekabrgacha har bir tuman va shaharda O‘zbekiston yoshlar ittifoqiga qarashli, barcha qulayliklarga ega bo‘lgan kutubxona va kitob do‘konini ham o‘z ichiga olgan kichik Yoshlar markazlarini barpo etish loyihasi haqida gapirdi.

Shuningdek, kelgusida Qoraqalpog‘iston Respublikasi, barcha viloyatlar va Toshkent shahridagi har bir tumanda bittadan kollej binosini O‘zbekiston yoshlar ittifoqi tasarrufiga berish lozimlgi ta’kidlandi.

Bundan tashqari, Shavkat Mirziyoyev mamlakatda yoshlarga harbiy ta’lim-tarbiya beradigan kursantlar maktablariga “Temurbeklar maktabi” deb nom berish, turli soha va tarmoqlarda katta natijalarga erishib kelayotgan yigitlar uchun “Mard o‘g‘lonlar” degan nom bilan Davlat mukofotini ta’sis etish, yoshlarga oid davlat siyosatini amalga oshirishda, o‘qishda, mehnatda, jamoat ishlarida har tomonlama faol bo‘lgan yigit-qizlarni taqdirlash maqsadida “Kelajak bunyodkori” medalini ta’sis etish takliflarini bildirdi.