Kecha — 30-iyun kuni Qarshining “Nasaf” klubi rekonstruksiyadan chiqarilgan stadioniga qaytdi va O‘zbekiston kubogi doirasida “Qo‘qon-1912” ustidan 4:1 hisobida zafar quchdi.
Ta’mirlash ishlari davom etayotgan bir paytda “Nasaf” G‘uzordagi stadionda uy uchrashuvlarini o‘tkazib kelayotgandi. Endilikda jamoaning uy stadioni avvalgidek 16 ming emas, balki 22 ming muxlisni o‘z bag‘riga sig‘dira oladi. Bunda yugurish yo‘laklarining olib tashlangani, muxlislar va futbolchilar o‘rtasidagi masofaning qisqarishiga turtki bo‘lgan.
2016-yilning 30-iyun sanasida O‘zbekistonning Birinchi Prezidenti Islom Karimov joylarda ijtimoiy-iqtisodiy islohotlarning borishi, amalga oshirilayotgan bunyodkorlik va obodonlashtirish ishlari bilan yaqindan tanishish maqsadida Qashqadaryo viloyatiga tashrif buyurgan edi, deb yozildi “Championat.asia” saytida. Tashrif doirasida Qarshi shahridagi “Markaziy” stadionga borgan davlat rahbari uni rekonstruksiya qilish, sportchilar va tomoshabinlar uchun qulayliklarni yanada oshirish, xavfsizlik choralarini kuchaytirish bo‘yicha zarur tavsiyalar bergandi. Oradan roppa-rosa bir yil o‘tib, 2017-yilning 30-iyun sanasida “Markaziy” stadion yangi qiyofada muxlislarni o‘z bag‘riga chorladi.
Izoh (0)