Fransiya politsiyasi 29-iyun, payshanba kuni Parij yaqinidagi Kretey shahrida avtomobilida masjid yaqinidagi olomonga bostirib borishga uringan erkakni qo‘lga oldi. Bu haqda Le Parisien manbalariga tayanib, “TASS” xabar bermoqda.

Voqea yuz bergan Val-de-Marn departamenti prefekturasiga ko‘ra, yo‘ltanlamasni boshqargan erkak masjid oldida to‘plangan dindorlar guruhiga bostirib borishga uringan, biroq bino oldiga o‘rnatilgan himoya to‘sig‘iga kelib urilgan.

Huquqbuzar ko‘p o‘tmay politsiya tomonidan uyida qo‘lga olindi. Masjid yaqinida bo‘lganlardan hech kim jabrlanmadi.

Hujum qilgan erkakning shaxsi va uni bunga undagan omillar hozircha oshkor etilmadi. Nashr uning tergovchilarga “Bataklan va Yelisey maydoni uchun o‘ch olmoqchi bo‘lgani”ni bildirganini ta’kidlamoqda.