“O‘zbekenergo” kompaniyasi 15-iyuldan elektr energiyasi tariflari ko‘tarilishini ma’lum qildi. Tariflarning yangilangan reyestri O‘zbekiston moliya vazirligi tomonidan 29-iyun kuni tasdiqlandi. Tariflar qayta ko‘rib chiqilishiga sabab sifatida yoqilg‘i-energetika resurslari narxining oshishi ko‘rsatilmoqda, deb xabar beradi “Gazeta.uz”.

Endilikda aholiga yetkazilayotgan 1 kVtch elektr energiyasining narxi 191 so‘mdan 204,3 so‘mga yetadi; elektr plitalar bilan jihozlangan turar-joylar aholisiga yetkaziladigan shu hajmdagi elektr quvvati narxi esa 95,5 so‘mdan 102,15 so‘mga ko‘tariladi. Shu tariqa, o‘sish taxminan 7 foizni tashkil qiladi.

Oxirgi marta elektr energiyasi va boshqa kommunal xizmatlar narxlari o‘tgan yil oktabrida oshgan edi.

15-iyuldan tabiiy gaz uchun tariflar ham o‘rtacha 7 foizga oshiriladi.