Prezident Shavkat Mirziyoyev Toshkentning Mirzo Ulug‘bek tumaniga tashrifidan so‘ng tuman faollari yig‘ilishini o‘tkazdi. Bu haqda, “O‘zbekiston” telekanalining “Axborot” dasturiga asoslanib, “Gazeta.uz” xabar bermoqda.
Yig‘ilishda bosh vazir va uning yordamchilari, Prezidentning davlat maslahatchilari, Toshkent va tumanlar hokimlari, vazirliklar, idoralar, xo‘jalik birlashmalari rahbarlari, tadbirkorlik subyektlari va jamoatchilik vakillari ishtirok etdi.
Uchrashuvda ko‘tarilgan asosiy mavzu tuman aholisida to‘planib qolgan muammolar yechimi hamda ijtimoiy-iqtisodiy rivojlanish masalalari bo‘ldi. O‘z chiqishida davlat rahbari Prezident virtual qabulxonasi va xalq qabulxonalariga kelib tushayotgan axborot tahlili fuqarolarni bezovta qilayotgan masalalarni hal qilish bo‘yicha ishlarni takomillashtirish talab etilishini ko‘rsatayotganini ta’kidlab o‘tdi. Buning uchun esa yangicha yondashuv, yangicha nigoh lozim, dedi davlat rahbari.
Yig‘ilishga tayyorgarlik ko‘rar ekan, maxsus ishchi komissiya tumanda bo‘ldi va bir kun davomida 730 muammoni aniqladi, shulardan 397 tasi joyida hal etildi. Qolgan masalalar yechimi bo‘yicha zarur qadamlar belgilandi. Xususan, 87 kam ta’minlangan oilalarga moddiy yordam ko‘rsatish bo‘yicha masala hal etildi, 27 fuqaro ish bilan ta’minlandi, 20 nafar yolg‘iz va keksa insonlarning uylarini ta’mirlashga ko‘mak beriladigan bo‘ldi.
Prezident “tashabbus ko‘rsatmay, tepadan ko‘rsatma kutib o‘tiradigan” hokimiyat va idoralar rahbarlarini tanqid ostiga oldi.
“Oddiy misol: ishchi guruh bu qadar qisqa vaqtda nimalar qilishga ulgurganini qarang”, — dedi Shavkat Mirziyoyev.
U har bir tumanda shunday ishchi guruh tuzish, shuningdek, aholi bilan har haftalik uchrashuvlar tashkil etishga ko‘rsatmalar berdi.
Prezident amalga oshirilayotgan choralar har bir insonning hayoti yaxshilanishiga, mahallalar, oilalar, mehnat jamoalari va o‘quv muassasalarida vaziyat yaxshilanishiga xizmat qilishi kerakligini ta’kidladi.
Aholi, ayniqsa yoshlar ishtirokidagi tadbirlar xo‘jako‘rsinga o‘tkazilmasligi lozim ekanligiga alohida urg‘u berildi. Ularga alohida tayyorgarlik ko‘rish kerak, aholi orasida nufuzga ega fuqarolar, xususan, shoirlar, ijodkorlar, olimlar, sportchilar ishtiroki ta’minlanishi maqsadga muvofiq.
Kommunal xizmat ko‘rsatish bilan bog‘liq muammolar eng qisqa vaqt ichida hal etishi lozimligi ta’kidlandi. Prezidentning so‘zlariga qaraganda, bu sohadagi muammolar fuqarolarning kayfiyatiga ayniqsa salbiy ta’sir ko‘rsatadi. U 2010-yildan boshlab “bir so‘m ham kredit jalb qilmagan holda” sifatli kommunal xizmat ko‘rsatilishini yo‘lga qo‘ya olgan Uchtepa tuman “Vatanparvar inoq kommunalchi” xususiy uy-joy egalari birodarligi raisi Svetlana Orlovaning tajribasini namuna sifatida ko‘rsatib o‘tdi.
Mamlakat yetakchisi, shuningdek, Chilonzor, Olmazor, Yashnobod, Shayxontohur, Uchtepa tumanlariga tashrifi chog‘ida berilgan ko‘rsatmalarning bajarilishiga to‘xtalib o‘tdi.
Izoh (0)